34 haftalik homilaning UTT tasviri

Har bir 34 haftalik homilaning ultratovush tasviri aynan shunday bo‘lishi shart emas. Shuning uchun, ultratovush tekshiruvidagi farqlar borasida tashvishlanmang, bachadonda homilaning turli xil holat va harakatlarda bo‘lishi odatiy holdir. Homilangizning ahvoli to‘g‘risida batafsil ma’lumotni shifokoringiz berishi mumkin.

34 haftalik homilador necha oylik?

Homiladorlikning 34-haftasi 8-oyga kiradi va homiladorlikning uchinchi trimestriga to‘g‘ri keladi.

Endi homiladorligingizning 8-oyi, 34-haftasida boshdan kechirishingiz mumkin bo‘lgan ba’zi alomatlar haqida.

34 -haftada homila harakatlari qanday?

Homilangiz tug‘ruqqa yaqinlashgan shu kunlarda ko‘proq dam oladi. Shu sababli, 34-haftada homila harakatlarida pasayish kuzatilishi mumkin. Bu sizni xavotirga solmasin.

Homiladorlikning 34-haftasida onadagi o‘zgarishlar

Ushbu haftada bachadon yuqori nuqtasidan qov suyagi uchigacha bo‘lgan uzunlik endi taxminan 34 sm, kindikdan bachadon yuqori nuqtasigacha esa 14 sm ga teng. Bular o‘rtacha o‘lchovlardir.

Homiladorlikning 34–haftasida e’tibor berish kerak bo‘lgan holatlar

Homiladorlikning 34 -haftasidagi og‘riqlar.

Tug‘ruq to‘lg‘og‘i qanday bo‘lishi haqida shifokoringizdan so‘rang. U sizga rostakam tug‘ruq to‘lg‘oqlari bilan ungacha bo‘ladigan hozirlik to‘lg‘oqlari orasidagi farqlar haqida tushuntirib bersin. Rostakam to‘lg‘oqlar miqdori doimiy ravishda ortadi va kuchayib boradi. Ular tartibli maromga ega.

Soxta to‘lg‘oqlar ko‘pincha rostakam to‘lg‘oqdan oldin paydo bo‘ladi. Og‘riqli bo‘lishi va rostakam to‘lg‘oqqa o‘xshashi ham mumkin. Ammo ko‘p hollarda bu tartibsiz va qisqa muddatli bo‘ladi. Tananing ko‘p qismlarini, masalan, mushaklar, qorinning pastki qismi yoki yelkalarni bezovta qilishi mumkin. Shuningdek, soxta to‘lg‘oqlar, homiladorlikning 34-haftasidagi qorin og‘rig‘i shikoyatining sababi ham bo‘lishi mumkin.

Rostakam tug‘ruq to‘lg‘oqlarida, bachadon ichidagi sanchiq og‘riqlar bachadonning yuqori qismidan boshlanib, tos sohasining pastki qismigacha butun bachadonga tarqaladigan og‘riqni keltirib chiqaradi.

Homiladorlikning 34 -haftasida qorin og‘rig‘i.

Homiladorlikning o‘rtalarida va keyingi davrlarida bel og‘rig‘i bilan birga kuzatiladigan qorin og‘rig‘i qandaydir muammoning xabarchisi bo‘lishi mumkin. Nima bo‘lishidan qat’i nazar agar:

− og‘riq kuchli va doimiy bo‘lsa;

− isitma bo‘lsa;

− qorin bo‘shlig‘ida shishganlik hissini keltirib chiqaradigan mushak qisqarishlari bo‘lsa;

− hayz paytida kuzatiladigan og‘riqqa o‘xshash sanchiqni boshdan kechirayotgan bo‘lsangiz;

− qindan qon ketishi yoki ajralma kelsa;

− oshqozon-ichak tizimida muammo alomatlari bo‘lsa;

− bosh aylanishi yoki garangsirash kuzatilsa, darhol shifokoringizga murojaat qilishingiz kerak.

Batafsilroq ma’lumot uchun shu maqola bor: Homiladorlikda nima uchun qorin og‘riydi?

Homiladorlikning 34 -haftasida jig‘ildon qaynashi.

Homiladorlikning oxirgi pallalarida o‘sayotgan bachadon va homila oshqozonni yuqoriga suradi va siqa boshlaydi. Bu bosim oshqozon kislotalarini yuqoriga surib, jig‘ildon qaynashiga olib keladi. Ammo 34-haftada homila tos suyagiga tushsa, jig‘ildon qaynashi va ich qotishi kabi ba’zi oshqozon-ichak muammolari yaxshi tomonga o‘zgarishi mumkin. Hamma ayollar ham bunday “yengillik”ka duch kelmasliklari mumkin. O‘sayotgan homila tug‘ruq yo‘lidan pastga qarab yo‘nalar ekan, ko‘krak qafasiga bosim o‘tkazishda davom etishi mumkin.

Bizda foydali maqola bor: Homiladorlikda jig‘ildon qaynashiga kichik qo‘llanma.

Tug‘ilishga 6 hafta bor