33 haftalik homilaning UTT tasviri

Har bir 33 haftalik homilaning ultratovush tasviri aynan shunday bo‘lishi shart emas. Shuning uchun, ultratovush tekshiruvidagi farqlar borasida tashvishlanmang, bachadonda homilaning turli xil holat va harakatlarda bo‘lishi odatiy holdir. Homilangizning ahvoli to‘g‘risida batafsil ma’lumotni shifokoringiz berishi mumkin.

33 haftalik homiladorlik necha oyni tashkil qiladi?

Homiladorlikning 33-haftasi deyarli 8-oyga kiradi.

Homiladorlik 33-haftasida homila harakatlari

Endi homilaning faol bo‘ladigan va dam oladigan muddatlari aniqlashgan bo‘ladi.

Ba’zi homilalarning faol bo‘lish vaqtlari ko‘p bo‘lsa, ayrimlar dam olish uchun ko‘proq vaqt sarflashadi. Harakatlarda jiddiy susayish yoki to‘xtash bo‘lmasa, 33-haftada homila harakatlarida kamayish kuzatilishi me’yoriy holatdir.

Agar siz xavotirlanayotgan bo‘lsangiz, oxirgi marta qachon homilangiz harakatini his qilganingizni, ikki harakat orasidagi muddatni va 1 soat ichida necha marta harakatni his qilganingizni yozib olib, shifokoringizga murojaat qilishingiz mumkin.

Homiladorlikning 33-haftasidagi onadagi o‘zgarishlar

Ushbu haftada bachadon yuqori nuqtasidan qov suyagi uchigacha bo‘lgan uzunlik endi taxminan 33 sm, kindikdan bachadon yuqori nuqtasigacha esa 13 sm ga teng.

Homila o‘sib borishi bilan siz ham vazn olishda davom etasiz. Hatto bu kunlarda homiladorlikning boshqa davrlariga qaraganda tezroq vazn olasiz. Ammo bu vaznning ko‘proq qismi homilaga to‘g‘ri keladi. Homiladorlikning 33 haftasiga kelib ilk kundan e’tiboran vazn ortishida umumiy o‘laroq 9 dan 13 kg gacha o‘sish kuzatiladi.

Tez o‘sib borayotgan homila oshqozoningizga ko‘p joy qoldirmayotgani sababli bu davrda jig‘ildon qaynashi ko‘proq bezovta qilishi mumkin. Kunda uch mahal ovqat o‘rniga, o‘sha ovqatni bir necha mahalga taqsimlab iste’mol qilsangiz, bu sizga yengillik berishini sezishingiz mumkin.

Foydali maqola bor: Homiladorlikda jig‘ildon qaynashiga kichik qo‘llanma.

Homiladorlikning 33-haftasida diqqat qilish kerak bo‘lgan masalalar

Homiladorlikning 33-haftasida og‘riq

Homiladorlikning 33-haftasida siz bachadon bo‘yni ochilishi holatiga duch kelishingiz mumkin. Ochilish tug‘ruq to‘lg‘oqlari boshlanishidan bir necha soat, kun yoki hafta oldin boshlanishi mumkin. Tug‘ruqdan oldin bachadon bo‘yni umuman ochilmasligi ham mumkin. Bu jarayon har bir ayol uchun turlicha bo‘ladi.

Ochilish asnosida siz qinda kuchli sanchiq kabi og‘riqni sezishingiz mumkin. Ammo homiladorlikning 33-haftasidagi og‘riqlar tug‘ruq boshlanganligini anglatmaydi. Buning sizga ham, homilangizga ham zarari yo‘q.

Homiladorlikning so‘nggi pallalarida qinda kuzatiladigan og‘riqlar odatda xavotirli narsa emas, ammo bu sizga juda ko‘p noqulaylik tug‘dirsa, bu borada shifokoringizga xabar berganingiz ma’qul.

Shuningdek, homiladorlikning 33-haftasida bachadon qisqarishlarini sezishingiz ham tabiiydir. Agar siz ham og‘riq, hamda bachadon qisqarishi va qattiqlashishini sezsangiz, bu qanchalik qisqa muddatlarda takrorlanayotganiga e’tibor bering. Haqiqiy tug‘ruq to‘lg‘oqlari har 5 daqiqa orasida kuzatiladi va tartibli oraliq bilan takrorlanadi.

Homiladorlikning 33-haftasida qov sohasi og‘rig‘i.

Ba’zi homilador ayollar qov sohasi og‘riqlariga duch kelishi mumkin. Bu homiladorlikning faqat 33-haftasiga xos bo‘lgan og‘riq emas. Homiladorlikning turli davrlarida ham paydo bo‘lishi mumkin.

Bu odatdagi homiladorlik shikoyatlaridan biri. Bunday og‘riq yengil yoki kuchli sanchiq shaklida yoki og‘riqqa va ko‘karish bordekka o‘xshash tarzda his qilinishi ham mumkin.

Og‘riqqa to‘qimalar va bo‘g‘imlarning yumshashi yoki bo‘shashishi sabab bo‘ladi. Tos suyagi o‘rtasida joylashgan ikkita qov suyakni bir-biriga bog‘laydigan tog‘ay yurganingizda kuchli og‘riqni his qilishingizga olib keladi.

Ushbu og‘riq ba’zi ayollarda kuchliroq bo‘lsa, ba’zilar uni tug‘ruqqa yaqin pallalarda sezadilar. Tug‘ruqdan bir necha hafta o‘tgach, qov sohasi og‘riqlari yo‘qolishi kerak. Qov sohasi og‘rig‘ini yo‘qotish uchun homiladorlar uchun maxsus kompression ishton-paypoq (kompression chulki, kolgotki) kiyish kerak bo‘lishi mumkin. Iliq hammom ham foyda beradi. Bundan tashqari, bir issiq, bir sovuq qilish amaliyoti yordamida ham og‘riqni yengillatish mumkin.

Qov sohasi og‘rig‘i juda kamdan kam hollarda revmatoid artrit sababli bo‘lishi mumkin. Bunday holda, og‘riq doimiy bo‘lib, asta-sekin kuchayadi va isitma chiqaradi. Agar shunday alomatlar paydo bo‘lsa, darhol shifokoringizga murojaat qilishingiz kerak.

Bizda foydali maqola bor: Homiladorlikda nima uchun qorin og‘riydi?

Tug‘ilishga 7 hafta bor