Homiladorlikning 16 haftasida homila jinsi aniqlashadimi?

Endi "16 haftalik homila jinsi aniq bo‘ladimi?" degan savolga kelsak. Sifatli ultratovush apparati va tajribali UTT mutaxassisi homiladorlikning 16-haftasida homila jinsini katta ehtimolli aniqlik bilan aytishi mumkin. Chunki avval boshida o‘g‘il bolalarning qorinlarida bo‘lgan yorg‘oqlar endi sekin-asta aslida bo‘lishi kerak bo‘lgan yorg‘oq qopchalariga tusha boshlagan bo‘ladi. Ushbu jarayon 30-haftaga borib tugaydi.

Homiladorlikning 16-haftasida onada qanday o‘zgarishlar ro‘y beradi?

Aytishimiz mumkinki, homiladorlikning 16-haftasi 4-oyga to‘g‘ri keladi. Keling, homiladorlikning 16-haftasida nima bo‘lishini ko‘rib chiqaylik?

“Kichkintoy”ingiz ulg‘aygan sayin bachadon va platsenta (yo‘ldosh) ham o‘sib boradi. Olti hafta oldin bachadoningiz vazni 140 gramm edi. Bugungi kunda uning vazni taxminan 250 grammni tashkil qiladi. Shunday qilib, homiladorlikning 16-haftasida bachadon kattalashib, qorningiz qappaygani sezilarli darajada bilina boshlaydi.

Homila atrofidagi amniotik suyuqlik miqdori ham ortib bormoqda. Endi bachadonda deyarli 250 ml suyuqlik bor.

Homiladorlikning 16 haftasida qorin kattalashib qolgan bo‘ladi. Bachadon hajmi bu muddatda taxminan 7.6 sm ni tashkil qiladi. Uni kindigingiz ostida osongina his qilishingiz mumkin.

Homiladorlikning 16-haftasida mushaklar og‘rig‘ini me’yoriy holat deb hisoblash mumkin. Buning sababi kengayib borayotgan bachadon atrofidagi mushak va biriktiruvchi to‘qimalarning cho‘zilishidir.

Qiziqarli video: 15 haftalik homilaning ham tug‘ilib yashab keta olgani haqida

Homiladorlikning 16-haftasida ko‘rib chiqiladigan masalalar

16 haftalik homiladorlikda qanday ovqatlanish kerak?

Homiladorlik davrida siz asosiy ovqatlanish oraliqlarida tez-tez yengil ovqatlanishingiz kerak. Ayniqsa, 16-haftani o‘z ichiga olgan 2-trimestr davrida! Asosiy ovqatdan tashqari, kuniga 3-4 marta yengil yemaklar yeb olishingiz sog‘lom bo‘lishga yordam beradi. Birinchidan, oraliqlardagi yeguliklar ozuqaga boy bo‘lishi kerak. Oraliqlarda ovqatlanish uchun asosiy taomlarga (nonushta, tushlik va kechki ovqatga) nisbatan kamroq bo‘lishi kerak.

Bizda foydali maqola bor: 2-trimestrda qanday ovqatlanish kerak

Homiladorlik davrida ovqatlanishning eng muhim maqsadi yetarlicha oziqlanishdir. Oraliqlardagi yeguliklar uchun ozuqaga boy mahsulotlarni tanlash sizdan biroz rejalashtirishni va harakatni talab qilishi mumkin. Oraliq yeguliklarni siz oldindan tayyorlashingiz mumkin.

Haftalik reja tuzing va xarid uchun bozorga yoki supermarketga chiqing. Ovqatlanish uchun kerakli ozuqa moddalarini tayyorlang. Barra sabzavotlar, mevalar, sut va sut mahsulotlari, tuxumlar, quruq mevalar va h.k.

Bizda foydali maqola bor: Homiladorlar ovqatlanishida 7 ta muhim qoida

Homiladorlik davrida qanday holatda yotish kerak?

Ayniqsa, ushbu haftada e’tibor berish kerak bo‘lgan masalalardan biri "16-haftalikda qay tarzda uxlash kerakligi” muammosidir. Endi dam olganda, uxlaganda yoki yotoqda jismoniy mashq qilish paytida orqa bilan (chalqancha) yotmaslik kerak. Ushbu holat tomirlarga qo‘shimcha bosim o‘tkazadi va homilaga boradigan qon oqimini kamaytiradi. Onadan homilaga boradigan qon oqimi homilaning o‘sishi uchun zarur bo‘lgan ozuqalarni yetkazadi. Bu muhim jihatni aslo unutmasligingiz va homilaning rivojlanishini xatarga qo‘ymasligingiz kerak.

Ilk qilinadigan ish: homiladorlikda to‘g‘ri yotadigan holatni toping!

“Kichkintoy”ingiz o‘sib ulg‘aygan sayin, siz qulay va uzluksiz uyqu bilan xayrlashishingizga to‘g‘ri keladi. Shuning uchun, garchi homilangiz o‘sayotgan bo‘lsa ham, qulay va rohat uyquni davom ettirish jihatidan homiladorlikdagi to‘g‘ri uyqu holatini topish juda muhimdir. Uyquga ta’sir qiladigan jig‘ildon qaynashi va bel og‘rig‘i homiladorlik davrida ma’qul bo‘lgan yotish holatini topishda qiyinchilik tug‘dirishi mumkin. Homiladorlikda qorin bo‘shlig‘i kattalashgani sababli siz endi qorin bilan yotishni xayolingizga ham keltirmasligingiz mumkin.

Homiladorlikda orqa bilan (chalqancha) yotish ham siz uchun qulay bo‘lmaydi. Chunki bachadon butun og‘irligini bel suyaklari va yelka mushaklariga beradi. Bunday holat asosiy qon tomirlarining siqilishiga sabab bo‘lgani uchun homiladorlikning oxirgi muddatlarigacha bunday yotishni tavsiya etmaymiz.

Homiladorlikda yotish holati qanday bo‘lishi kerak?

Chap yoki o‘ng yonboshga o‘girilib, bukilgan tizzalaringiz orasiga yostiq qo‘ying. Bunda tizzalaringizni bukish usuli sizning va homilangizning qulayligi uchun muhimdir. Homiladorlar uchun chiqarilgan maxsus yostiqlar ham yanada rohat bilan uxlashingizga yordam beradi. Ba’zi ayollar qorinlari ostiga yostiq qo‘yishni afzal ko‘rishadi. Homiladorlik davrida qay tarzda uxlashni to‘liq tasavvur qilishingiz uchun misol tariqasida quyidagi suratni havola qilyapmiz.

Homiladorlikda chap yonboshga o‘girilib yotish bolaga ko‘proq qon yetib borishini ta’minlagani uchun tanadagi shishni ham kamaytiradi. Yonboshga yotganingizda oyoqlaringizni ozgina buksangiz yanada qulayroq bo‘ladi. Homilador ayollar qanday uxlashi kerakligi haqida gap ketganda, endi siz eng ma’qul holat qaysi ekanligini bilasiz.

Juda oz inson tun bo‘yi bir xil holatda uxlashi mumkin. Shuning uchun ba’zida uyg‘onganingizda chalqancha yotgan bo‘lsangiz vahima qilmang. Siz homilangizga zarar yetkazadigan hech narsa qilmadingiz. Bunday paytlarda yonboshga o‘girilib yana uxlashga harakat qiling.

Homiladorlikda uyquda yotish holati bolaga ta’sir qiladimi?

Bachadon va homilaga bosim bergani sababli homiladorlik davrida uxlash holatiga e’tibor berish kerak. Homiladorlik davrida qanday yotish holatlari homila uchun noqulay bo‘lishi mumkinligi haqidagi savollaringizga oydinlik kiritaylik.

Homiladorlikda yonboshlab yotsa homila eziladimi?

Yuqorida aytib o‘tganimizdek, homiladorlik davrida uyqu vaqtida eng yaxshi yotish usuli bu yonboshga yotishdir. Qon aylanishini yanada osonlashtirish uchun chap yonboshga yotish yaxshiroqdir, ammo bu o‘ng yonboshga yotib uxlash homilaga zarar yetkazadi degani emas. Ikkala tomonda ham uxlash ma’qul hisoblanadi. Shunday qilib, homiladorlikda yonboshga yotib uxlash homilaga zarar yetkazmaydi.

Homiladorlik davrida qoringa yotish bolaga zarar beradimi?

Homiladorlik davrida qoringa yotish masalasi tez-tez onalarni tashvishga solishi mumkin. Qoringa yotish “kichkintoy”ingizni o‘rab turgan amniotik suyuqlik tufayli unga zarar qilmaydi. Ammo homiladorlikning 6-haftasidan keyin qorinning kattalashishi tufayli vaziyat o‘zgaradi va qoringa yotish o‘zingiz uchun ham noqulay bo‘ladi.

Foydali maqola shu yerda: Homiladorlikni eng chiroyli tarzda o‘tkazish uchun tavsiyalar

Homiladorlikda orqa bilan (chalqancha) yotish bolaga zarar beradimi?

Homiladorlik davrida orqa bilan (chalqancha) yotish homila uchun noqulaydir. Bachadoningizning tana orqa qismiga beradigan og‘irlik va bosim og‘riqqa sabab bo‘lishi mumkin. Tomirlarga bergan bosim natijasida qonning ravon oqishida muammolar kelib chiqishi mumkin. Shuning uchun homilangizning sog‘lig‘i uchun chalqancha yotishdan saqlanishingiz lozim.

To‘lig‘icha o‘ng yoki chap yonboshga o‘girilish ham shart emas. Qorinni ozgina yon tomonga o‘girish ham bosimni kamaytirish uchun kifoya qiladi.

Tug‘ilishga 24 hafta bor