Hayot juda qiziq-da!

Farzandsizlik bilan murojaat qilgan patsiyentlar bilan uzoq shug‘ullanishga to‘g‘ri keladi. Bosqichma-bosqich turli davo choralarini ko‘ramiz, oylab kutishga to‘g‘ri keladi, tahlillar, tekshiruvlar, muolajalar o‘tkaziladi. Ba’zida EKU muolajasiga murojaat qilinadi. Unga tayyorlashning o‘zi ham oson emas. Homiladorlik esa har doim ham bo‘lavermaydi. Yillardan beri farzand kutayotgan juftlik uchun bu og‘ir narsa. Bunday holatlarda patsiyentni ko‘z yoshlariga sherik bo‘lishga ham to‘g‘ri keladi. Axir shifokor uchun ham bu qandaydir ruhiy zarba beradi. Agar homiladorlik yuzaga kelsa, uni saqlab qolish uchun yana ancha “terlash”ga to‘g‘ri keladi. Bu orada patsiyent balki kunda yoki kuniga bir necha bor har bir o‘zgarishdan xavotirlanib telefon qiladi. Erta tongmi, tunmi farqi yo‘q javob berish kerak. Ba’zan turmush o‘rtoqlari, ba’zida qaynonalar ham qo‘shiladi.

Ba’zida ilk haftalarda, ba’zida homiladorlikning o‘rtasida bola tushishi bo‘lsa, bu ham yana bir zarba. Ham patsiyentga dalda bo‘lishim va o‘zim nima xato qildim yoki nima sabab bo‘ldi ekan deb bosh qotirishim kerak. Endi shunaqa patsiyentlarning bir nechtasini birga tasavvur qilinsa, holat yanada oydinlashadi. Yo‘q, men bu kasbni o‘zim tanlaganman, shikoyat qilmoqchi emasman. Insonlarga xizmat qilib farzandli bo‘lishlariga ko‘maklashish men uchun ulkan baxt.

Men boshqa narsadan shikoyat qilmoqchiman. Ana shu farzandsizlik muammosi bilan terlab-pishib kurashib turgan paytingizda sizga “men homilador bo‘lib qolibman, qandoq qilib homilani tushirish mumkin”, “bilmasdan to‘y bo‘lmasdan homilador bo‘lib qolibman, tushirishga tabletka yozib bering” yoki “Erim hozir farzand istamayapti, nima qilay, homilani oldirsam zarari yo‘qmi?” kabi savollar bilan murojaat qilishlari shunaqangi og‘ir botadiki, ey voh, deyman. Rosa alam qiladi. Insonlar bir tomonda yillab davolanib, qancha pullar sarflab farzand ko‘rishga tirishib yotsa-yu, bir qiz (bilmadim qiz desa bo‘ladimi) yoki ayol Xudo bergan homilaning zaruratsiz, farzand bo‘lib tug‘ilishiga imkon bermay “qatl” qilishga yordam so‘rasa?!

Jon singillarim, avvalo bilingki, qiz bolaning eng katta sarmoyasi uning NOMUSidir. Qiz bolaning nomusi xuddi insonning joni kabi qonun bilan himoya qilingan. Agar u oddiy arzimas narsa bo‘lganda qonunda ham bunchalik ahamiyat berilmagan bo‘lardi. Shuni hech qachon unutmangki, eng bezori yigit ham turmush o‘rtog‘ini nomusli, hayoli bo‘lishini istaydi. Endi qayoqda qoldi, siz kutayotgan “oq ot mingan shahzoda” nomussiz, hayosiz qizga uylansin! Shunday ekan, nomusingiz sizga omonat, uni asrab avaylang! Nikohsiz, ota-ona roziligisiz uni hech kimga topshirmang.

Endi oilasi bo‘lib, turli bahonalar bilan abort qildirmoqchi bo‘lgan ayollarimizga gapim. Farzand o‘zining rizqi bilan keladi. Rizq berguvchi Alloh dunyodagi behisob maxluqotni rizqini berib turibdi. Kichik bir qurtni, ojiz bir lichinkani ozuqasiz qoldirmagan Zot farzandingiz rizqini ham beradi. Hatto farzand tug‘ilishi o‘sha oilaga baraka olib keladi. Chunki chaqaloq bor uyda farishtalar ko‘p bo‘ladi. Hayotda buning ko‘p o‘rnaklari kuzatilgan. Hozir imkonim yo‘q degan bahonalar bilan o‘z farzandingiz “qotiliga” aylanishingizga yo‘l qo‘ymang. Shifokorlarni ham bunga sherik qilmang.

Reproduktolog, ginekolog Nilufar Kabilova

Abort qildirmoqchiman, dori yozib bering

Mavzuga oid boshqa materiallar